04.08.2025, 11.57

Lagerdraht

Tag 1
Üses Abentüür hed am Samschtig mit ere dramatische Verfolgigsjagd gstartet..🕵️‍♂️💵
Under strengem Verdacht sind üsi Häftling is Appezell abgführt worde.
Nach ere Zwüscheverpflegig hend mier zerscht es Kennenlernspiel gmacht.
Scho bald hed en feine Spaghettiplausch uf üs gwartet! 🍝
De Abig hend mier mit verschiedne Spiili usklinge lah..🃏

Tag 2
De Sunntigmorge hend mier mit de Gang-Gründig gstartet. I zwei Teams hend mier üsi Fahne dekoriert und d’Knastpost id Freiheit gschickt. 🏁📮
Am Namittag hend mier um üses Gebiet kämpft. D’Gang „El RedBull“ hed de Sieg gäge „Minigang“ gholt. 🏆
Zum Glück hed doch no uf alli es feins Znacht gwartet – danke a üses grandiose Chuchiteam 😋

Tag 3
Nach em Zmorge hemmer üs ufe Weg gmacht, zum Morgeknaschtsport. Bim Fuessballspiel hend die beide Teams es knapps Chopf a Chopf Renne gha. ⚽️

Zum Zmittag heds es feins Riz Casimir gäh🥘. Am Namittag hemmer üs i zwei Gruppe ufteilt und es Rätsel dur en „Escape Room“ gmacht. Am Abig hemmer den es Krimidinner gha. Es isch mega luschtig und interessant gsii, denn de Mörder isch bis zum Schluss ned ufdeckt worde.😎

Tag 4
Nachdem mier geschter usegfunde hend, dass üsi Häftling en heimliche Usbruch plant hend, hends hüt Morge müesse dinne bliibe. ⛓️🏢
Zur Beschäftigung hend sie ihri Strafakte gstaltet.

Am Namittag hemmer üs uf d‘Suechi nach em Mister X gmacht. 👀

Nacheme feine Znacht simmer am Abig mit de ältere Chind in Appezell no in Usgang und die jüngere hend de Film Räuber Hotzenplotz dörfe luege. 🎥🍿

P.S. Au d‘Sunne hed hüt endlich mal verbii gluegt! ☀️

Tag 5:
Hüt Morge früeh simmer zur Ihstimmig mit emene Wanderlied gweckt worde.🎶⏰
Mit em Zug isch es den ahschlüssend uf Weissbad gange.🚂 Vo det us simmer steil duruf gloffe, bis mier den churz nach em Mittag bim Seealpsee acho sind🥪

Nach em Mittag hend sich üsi Häftling uf d‘Suechi nacheme Hiiwiis zu üsem Täter gmacht.❌

Ahschlüssend simmer den retour i üses Gfängnis🥲 de Abig hemmer singend usklinge la😇

Tag 6
Nach dem mir üse wohlverdient Schlaf nach dere stränge Wanderig gnosse hend, sind mir am halbi eis i de Nacht wider ufgstande zum heimlich en wiitere Hiwiis uf de würklichi Täter zbecho. Zäme mit es paar verbündete Leiter hemmer üs im Liecht vo üsne Fackle uf d’Suechi gmacht, sind denn aber leider doch vo de Polizischte gschnappt worde… 👮‍♀️
Aber für de Hiwiis übers Funkgrät heds knapp no glanged. 😜

Nach stränge einehalb Stund simmer zrugg in üsi Zellene und hend sogar dörfe usschlafe, so dass am nächschte Morge en feine Brunch uf üs gwarted hed. Mir hend halt eifach die beschti Knaschtchuchi! 🥓🥞🍳

Am Namittag simmer denn id Turnhalle go Spieli spiele🤗

Zum Znacht heds feine Burger gäh🍔 Am Abig hemmer denn no es sehr interessants Chlii gäge Gross gspielt, wo sich d‘Chind de Sieg gäg üs Leiter gholt hend.😅 P.S die zwei wo d‘Plank Challange gmacht hend, hend über 10 Minute durezoge🔥

Tag 7
Am Fritigmorge heds denne gheisse: „alles oder nüt“. Bi de Grichtsvehandlig hemmer de Richter👨‍⚖️ ahand vo üsne gsammlete Bewiis vo üsere Unschuld chönne überzüge. Zum Schluss hed es eidütigs Video de wahri Täter El Muro überfüehrt!
Mier sind erliechtered und hend das grad bimene 4 Gäng Gala-Zmittag gfiired. 🥗🍕🍰
Am Namittag hemmer üs denn chli Wellness gönnt 💆‍♀️. Vo Fuessbäder über Massagene bis zum Friseursalon isch alles im Ahgebot gsi.
Am Abig hemmer denn no üsi legendäri Disco gfiired 🪩💃🏼🕺.

Es isch en unvergessliche letschte Abig gsi! 🤩 und übrigends chönd mier au professionell Haar schnide!✂️😉