05.08.2024, 08.38
Samstag, 3. August
Am Samstig Mittag simmer als ersts zäme nach Hollywood is Emmital greist. Uf em Wäg dett ane, hend alli ihren Hollywood-Pass übercho. Nach es bitzeli Freiziit und em Bezug vo üsem Luxuscamp hemmer de Ping-Pong Tisch iihgweiht, üses erste feine Znacht dörfe gnüsse und es Kennelern-Spieli gspielt. De Abig hemmer denn mit Lieder am Lagerfüür usklinge lah.
Sonntag, 4. August
Am Sunntigmorge sind üsi junge Stars gweckt worde, mit em Uftrag Sportkleider z’montiere. Zäme hemmer denn de Tag mit enere morgentliche Yogarundi gstartet. Vor em Zmittag hend denn üsi Trainings zu echte Schauspieler agfange. Mir hend glernt, wie mer Outfits zämestellt, wie mer sich uf Interviews vorbereitet und sich selber mit Hilf vo Bilder beschriebt. Zudem hemmer es Sprachtraining gha und ersti Erfahrige als Schauspieler gmacht, i dem mir es Pantomime-Spieli gspielt hend. Jetzt hemmer üs es feins Zmittag verdient! Nach emene super Zmittag vo de beste Kuchi vo de Welt, hemmer üsi Pöste no beendet und sind denn zu emene Mensche-Memorie überegange. Nachher isch s nomal chli ernster worde, denn mir hend es Quiz gmacht, wo mir üses Hollywood-Wüsse zum Beste geh hend. Zum Znacht hets Pizza geh, die isch so guet gsie, dass mir keis einzigs Stückli übrig lah hend. S Abigprogramm isch denn chli gmüetlicher worde, nämlich hemmer en Spieliabig gmacht, wo nomal learnings vom Tag ih de Praxis güebt worde sind.
Montag, 5. August
Plötzlich zmitzt ih de Nacht am 3:15 simmer vo de Leiter gweckt worde, denn nach em Motto «Wer schön sein will, muss leiden», hemmer üs uf d Sunneufgangswanderig gmacht für es Shooting uf de Hollywood-Hills. Leider isch s Ziel aber verduscht worde und nach emene feine Zmorge, hemmer üs wieder uf de Heiweg müsse mache. Dett hemmer denn mit Erschrecke festgstellt, dass mir eigentlich scho die ganz Wuche bi de Hollywood-Hills wohned. Sobald mir heicho sind, hemmer ahgfange üsen Schönheitsschlaf nahzhole, bevors denn Älplermagaronen zum Zmittag geh het!
De Mäntig Namittag isch denne recht entspannt verlaufe. Mir hend Schauspiel-Gruppene bildet und üs für en Filmszene entschiede, wo mir denne iüebe und spiele werdet. Damit das Ganze chli kreativer wird, hemmer die Szene umgschriebe, wiiterentwicklet und no zu denne Änderige es Drehbuech gschriebe. Nach emene feine Zvieri sind no chli Volleyball, Kub, PingPong und anderi Spieli gspielt worde, bevor mir denn am Lagerfüür grilliert hend. S Abigprogramm isch denn sehr frei gstaltet worde, will mir nach dem ahstrengende Tag scho recht müed gsi sind.
Dienstag, 6. August
Nach emene erholsame Schlaf i üsne king-sized Bett hemmer üs um die 9i denn uf de Wääg nach Langnau i E. gmacht. Wo mer üs uf en Entdeckigstour in Form vomene Foxtrail begäh händ, um üsi 5 Sinn z stärche und üsi glernte Fähigkeite unter Bewiis z stelle. Wie au i de vergangnige Tääg hed üs s Chuchiteam es feins Lunch-Zmittag vorbereitet!
Nachdem mir vom Foxtrail heicho sind, hemmer en Wasserschlacht verahstaltet, zum üs abküehle. Debii isch keine troche bliebe 🙂
Am Abig simmer mit emene feine Knöpfliuflauf bekocht worde und ahschlüsend hemmer es Glacé gnosse, während dem mir de Geburi vom Sven gfiiered hend. Das Dessert isch vo de Margrit gsponsoret worde – Dankee!! Wiiter isch es denn mit enere Aftershowparty gange, wo sich alli hend könne ustobe und mir üsi Dancemoves zum Beste geh hend.
Mittwoch, 7. August
Nach dene zwei stränge Täg hemmer üs denn am Mittwuch ganz en gmüeltiche Morge gönnt. Mir hend könne usschlafe und d Kuchi het en Brunch vorbereitet, wo mir wie ih emene 5-Stern-Hotel hend dörfe gnüsse.
Nach em Mittag isch s Mr.X losgange. Nebe Ufgabe wie Spieli spiele, singe und Lüüt z interviewe, hemmer au Sache müsse mache, wie ganz neui Nahrigsmittel z probiere oder es Tuschgschäft abzwickle. Mit üsne Trader hets zum Teil sogar gheimi Deals geh, wo mir abgschlosse hend. Gege Schluss hend sich zwei Gruppe es spektakulärs Kopf ah Kopf Renne glieferet. Nach emene guete Znacht hend sich alli Newcomer wo scho ih de Oberstufe gsie sind, am Abig mit de Leiter dörfe in Usgang begeh. Sie hend de Abig bi es paar Spiele, viel Lache und guete Gspröch am Tisch usklinge lah, während dem die Jüngere zäme en Film gluegt hend.
Donnerstag, 8. August
Am nächste Morge hemmer erfahre, dass mir üsen eigene Film bis am Mittag münd abdreiht ha. Mir hend also gwüsst, mir hend kei Ziit zum umetrödele und es wird chli stressig werde. Nach de Maske, vielne Takes, Stunts und Geduld hemmers aber alli gschafft. Jetzt simmer wahri Schauspieler! Mal luege für wers bis nach Hollywood langed 😉
Nach em erfolgriiche Abschlüsse vo üssne erschte Videodrehs hed üs s’Leiterteam uf Las Vegas iglade, wo mir während emene Casinonami üses verdiente Geld hend chönne vermehre….. oder au absolut nöd 😉 . Wenn alles Gäld wäg gsi isch, hed mer chönne dur löse vo Ufgabe wider an Spielchips cho. Am Poker, Roulett oder sogar Baccarattisch isch’s denn im
Casino so tifig zue und här gange, dass am 6i alli froh gsi sind, wo en feine Burger uf üs gwarted hed. Gsterkt hemmer denn am Abig imene Chii gege Gross chönne d’Leiter usefordere idem mir Chartehüsli baut oder möglichscht vill Redli gschlage hend. Au es Ross und Musigquiz hed da nöd döffe fähle. Wie nöd andersch erwartet hend natürlich mir Chind gwunne.
Freitag, 9. August
Am Friitigmorge isch’s denn mit em Bastelprogramm wiitergange. Öb Itritscharte bastle, Bilderrähme verziere oder Händabdrück für de Walk of Fame z mache. Mer hend sicher gnueg z’due gha. Vor em Mittag hemmer au no chönne üse neue Starname ussueche und hend en Rundi Werwölfle gspillt.
Nach em Wellnessnamitag isch denn s’Galadinner / d’Oskarverleiig und d’Disco aggseid. Bevor es denn am Samschtigmorge scho wider uf de Wäg nach Ägeri gaht.
Ganz liebe Grüessli us Hollywood
Jessica und Joschi